1
/
5
This page is intended for users in Hong Kong. Go to the page for users in United States.

Wantedly Journal | 仕事でココロオドルってなんだろう?

Interview

【見工必答題】「自我介紹」應該點答好?

見工嚟講,自我介紹就好似「送禮勤」咁常見,但筆者近日就留意到好多人都會講返喺CV上面寫咗嘅嘢,就好似以前上堂望住老師照住個PowerPoint讀咁,有乜為呢?

2020/10/14

所以今次筆者就想同大家講吓,究竟一個好嘅自我介紹應該係點!

一個好嘅自我介紹離不開三個條件:關份工事、全面、深刻。

1. 點樣令到你關事呢?唔好只係停留喺你個title度。

唔理你以前做BD、補習老師、marketing、CS都好,你講嘅內容一定要關你見緊呢份工事(如果你係轉行就冇影響啦,等陣再講埋轉行應該點講)。

就好似筆者咁,雖然個title叫Content Creator,但除咗要寫文、執圖、影相之外,其實仲要做埋marketing、translation、落ad(下刪一萬字)。

所以當你講自己professional background嘅時候,記得揀返啲關份工事嘅重點講,而其中一個要思考嘅點,一定係你解決過啲咩問題(證明自己係problem-solver)。

例如你覺得呢行或者間公司有啲咩問題,你又做咗啲咩去解決個問題,如果解決唔到你又試過邊啲方法等等。

例如你見marketing,你唔會講自己以前sell過幾多個客,做咗幾耐補習老師,而係講你做咗啲咩令到多啲人識個brand、點樣做低啲個CPC之類;就正如你去見另一半嘅父母,你寧願講自己份工,都唔會講以前嘅感情世界啦……

2. 咁全面又係點呢?唔係叫你講哂祖宗十八代出嚟呀!

所謂全面係叫你唔好淨係講職業相關嘅嘢,應該講吓自己嘅興趣,一樣最鍾意做嘅嘢,然後呢啲事點樣影響或者改變自己,又同你嘅職業有咩相關。

假設你好鍾意睇Netflix先算,你可以因為咁而睇咗好多documentary(識多咗嘢),又可以因為咁想學外語(好學),重點係你點樣包裝呢件事。

3. 深刻呢壇嘢,其實真係好難。

但最基本有兩個點:笑、勁。

當大家以為筆者又寫文寫到痴咗線嘅時候,其實笑容真係可以解決好多問題。

當然唔係叫你笑到好似「八兩金」咁,而係當你喺成個interview期間,可以keep住一個friendly嘅笑容,其實會加好多分。(Wantedly嘅international HR — George都係咁講㗎!)

勁都唔使點解釋啦,就真係好睇大家修行,例如你做sales幫間公司一年做幾百萬生意、落ad將個CTR推到去50%之類。

但就算你真係咁勁都好,千祈唔好淨係focus講呢堆achievement,因為咁樣好容易畀人覺得你自負。

原來寫寫吓都成千字,希望呢篇千字文會幫大家搵到份自己鍾意做嘅工之餘,如果見得成份工嘅話,記得要去支持返個經濟圈,推動本港經濟發展呀!
  p.s. 轉行嘅大家係咪以為筆者唔記得咗大家呢?如果係轉行嘅你,記得一嚟就同人哋講點解想轉行,同埋自己點解有資格轉去呢一行,即係人哋點解要請你。個原因千祈唔好話咩「想試吓」、「想挑戰吓自己」,諗返啲實際嘢,同埋自己做過啲咩去裝備自己。否則衰啲講句,真係冇人會請你㗎……

✨ 想即刻搵份新工?睇吓Wantedly有咩啱自己啦!✨

NEXT