1
/
5
This page is intended for users in Hong Kong. Go to the page for users in United States.

【打工仔急救小隊】價值觀「二選一」賽後報告!

雖然唔知道呢張簡短嘅form幫唔幫到大家諗啲咩,但都要多謝大家有畀過feedback,容許筆者嘗試喺呢篇短文畀到啲方向大家啦。

畀返少少基本資料大家先啦,今次呢個survey有24個人reply、年齡層由18至37歲、工種太多元(佔最多嘅係marketing/PR)。

時不宜遲,入正題!

問:「好同事」定「好老闆」?
答:「好老闆」(62.5%);「好同事」(37.5%)

其實兩邊並唔係mutually exclusive,而本身呢個問題其實係想大家諗吓自己頂唔順啲咩,同埋而家身處喺一個咩狀況。

筆者就兩邊都遇過哂(當然唔好嘅都有遇過),而個人認為「好老闆」的確係緊要好多。功利啲講句,好老闆唔單只係教到你嘢咁簡單,當你個好老闆離開間公司嘅時候,分分鐘仲會帶埋你走,而筆者身邊都不乏呢啲例子;反而好同事雖然可以一齊捱,但大家始終都係會離開間公司,同埋如果真係friend嘅話,轉咗工都會約出嚟見面㗎啦,對career嘅影響不大。

再加上一個老闆好唔好,最起碼你可以喺interview嘅時候約略觀察吓,喺佢嘅談吐舉止上了解吓佢大概係一個點嘅人,而「好同事」就真係可遇不可求。

問:返工鍾意做「識做」嘅嘢定係「想做」嘅嘢?
答:「想做」(75%);「識做」(25%)

其實筆者冇諗過會有成3/4人揀「想做」,既然係咁大家或者可以諗吓以下嘅問題(如果你係想搵工嘅話):

1. 你而家份工係咪做緊啲想做嘅嘢?
2. 你想做嘅究竟係咩嘢?(盡量唔好天馬行空)
3. 市場上有冇呢份工嘅存在?(如果冇嘅就要去諗過其他想做嘅嘢,除非你自己做老闆)
4. 你識唔識做你想做嘅嘢?(唔識就要去學,如果唔係點請你)

至於揀咗「識做」嘅你就非常簡單,諗吓自己識啲咩,再對返啲job posts上面有冇你識嘅技能,然後就去馬~

同埋有一樣嘢筆者覺得好緊要,就係好少會有一份工係會要求你只係做自己想做嘅嘢,所以喺搵工嘅時候就要再睇吓自己接唔接受到其他job requirement。

例子:筆者本人比較抗拒做sales,所以只要見到有sales responsibilities嘅工就會「頭也不回」~

至於其他問題都係想畀兩個方向大家,等筆者畀個簡略個result畀大家睇先。

至於係邊兩個方向呢,in general就係start up同大公司,因為喺絕大部份嘅情況下,兩者分別會係咁:

Start up:flexible working hours、open office、人工唔會高(未必係低呀講明先)
大公司:朝9晚6、partition、package正路都會好過start up

利申返:人工高低同自己鍾唔鍾意都唔係mutually exclusive,但既然大部份嘅你揀咗唔介意人工低嘅話,社企或者start up就好有可能適合你。(而舒服遠近呢啲就好見仁見智,而咩為之舒服都係要你自己去定義)

睇到呢度可能大家會覺得:超,咁去到最後你咪即係咩都冇講過。其實冇錯,亦都有user同筆者反映過好多嘢都唔係「非黑即白」。

所以筆者寫咁多字,都只係想大家諗吓喺搵工嘅時候多數會問自己嘅問題,而當大家答哂以上呢堆問題嘅時候,之後要做嘅就係排序,究竟邊個條件對你嚟講最緊要,因為筆者相信唔會有一份工可以滿足哂大家所有嘅願望。(如果大家睇完呢個總結之後,有嘢想同筆者傾嘅話,都歡迎隨時send個message嚟㗎~)

最後筆者想提一提大家,其實搵工係一條好漫長嘅路,而大家搵工期間都多少會有壓力,但筆者作為一個過來人,搵工呢件事真係「寧缺莫濫」,如果唔係好多時只會由一個地獄跳咗去另一個地獄。

彩蛋🥚

有填呢份form嘅人都會知道筆者最後一條問題係:「搵錢」定「追夢」。理論上呢兩件事係可以同時存在,但好可惜喺香港好多時都係要二揀一,之所以點解時不時都會有新聞標題係:「XYZ棄高薪厚職 遠赴ABC做PQR」。

樂見嘅係超過50%人都揀咗「夢想」,而夢想總會好遙遠。最後最後,筆者同大家都一樣跌跌撞撞,但都相信搵錢同夢想其實真係可以並存,成個情況就好似今時今日嘅香港一樣:唔係見到希望先去努力,而係努力先會見到希望。

Wantedly, Inc. (Hong Kong)'s job postings
1 Likes
1 Likes
If this story triggered your interest, go ahead and visit them to learn more