1
/
5
This page is intended for users in Hong Kong. Go to the page for users in United States.

【搵工之必要】② CV究竟要點寫!?(內附template)

踏足咗呢個社會一段日子,筆者由以前「好傻好天真」,去到而家都叫做有返啲經驗,而搵工嘅模式都因為咁而變咗,至於份CV又變成點呢?格式又有咩要注意,啲skills又點寫好呢?咁就要講返以前先。

唔知大家係咪同筆者一樣,初初搵工(甚至而家)都會漁翁撒網,係又apply唔係又apply,抱住一個「總有份會中」嘅心態,試圖喺「工」海搵到屬於自己嘅「另一半」,但呢個就係問題所在!

首先,我哋嘗試從交友app嘅角度去分析呢件事(事關筆者有個朋友最近幾乎試過哂所有交友app):

你玩交友app嘅目的係咩?不論係搵人「過世」定「拍散拖」都好,都係想識個朋友,甚至搵到個伴侶。咁當你用個app嘅時候,除咗第一時間睇人哋張相之外,係咪都會睇唔同條件先?

咁問題就嚟啦,當你見到哂人哋想要嘅條件係啲咩,例如:唔食煙、唔飲酒、冇宗教信仰……你又唔符合人哋嘅條件,咁你又點會收到回覆呢?

講返搵工又點呢?先講格式。

好多人都會選擇上網搵template,筆者初初出嚟做嘢又何嘗唔係,貪方便嘛。但有一次見工嘅時候,個HR就咁問:「你覺得自己份CV有冇咩問題?」筆者當時心諗,都執咗咁耐,唔係仲有錯呀……

然後佢就補多句:「你份CV係寫得幾好,但你呢個template我都已經唔知見過幾多次,如果你真係有心喺呢度做,真係覺得呢份CV代表到你自己嘅話,你又會唔會就咁搵個template就send出去畀人先?」

筆者當下都無言以對,亦都因為咁,於是就決定要由零開始整一份CV。當然,一定會睇好多唔同嘅reference,但最起碼你唔會再畀HR覺得你hea先啦。

格式嚟講離不開兩個條件:簡潔、清楚。無論你有幾creative也好,最基本就係要人睇得舒服,咁你先會有被選擇嘅機會,如果要個HR睇得好辛苦,甚至睇都睇唔明的話,你又點會有機會去見工呢?

當解決咗最基本呢兩個條件,就可以畀返自己嘅style落去,咁你可能就會諗:如果我淨係識用Word,可以有啲咩style……?

而家咩年代呀?筆者上網Google吓都搵到大把YouTube片教人點做啦,淨係識用Word並唔係藉口。(睇哂篇文先好睇下面嗰兩條片呀!)

呢round筆者嘅!參考片一參考片二

咁skills又點寫呢?

假設你想搵marketing嘅工作,人哋可能會要求你識SEO、Google Ads之類嘅工具,當你份CV連呢啲keywords都冇嘅時候,你份CV根本唔會去到HR手上,你冇睇錯呀,個人係唔會見到你份CV㗎,點解?

因為越嚟越多公司都會用applicant tracking system (ATS)去慳返啲時間,而呢個ATS好多時會睇嘅,就係你份CV hit到佢哋份job post內容嘅幾多percent。

例如唔同嘅skills同tools,所以你第一件事要做嘅,就係睇返人哋個job post有咩要求,再擺返啲keywords落去。

其次就係啲skills有幾「專業」,又點樣分類?其實所謂咩professional、elementary之類,真係睇你自己覺得自己咩斤兩。假設先講professional,筆者嘅定義就係有關呢個技能又或工具嘅任何問題,你都會解答到。

如果你自問係咁,絕對可以寫落去,但如果你覺得自己唔係,就千祈唔好「扮四條」,否則畀人試一試,你到時唔識做或者答嘅時候,真係會好肉酸……

當然,你係絕對可以講大話,唔識都扮識擺落去份CV,就好似玩交友app一樣,但只要你去到interview,或者見嗰位新相識嘅朋友,所有嘢就只會「見光死」,你都唔會想咁㗎?

所以承接返上一篇「言而有信」,做人最緊要係誠實,但真誠之餘都仲要有啲技巧,筆者兩樣都講咗少少啦,你哋又準備去搵返份好工未呢?

p.s. 唔想由零開始砌份CV,試吓base on個template再執執佢?(呢個網好嘢嚟㗎~)😉

有幾份新工喺樓下,睇吓啱唔啱你啦😎

Wantedly, Inc. (Hong Kong)'s job postings
1 Likes
1 Likes
If this story triggered your interest, go ahead and visit them to learn more