1
/
5
This page is intended for users in Hong Kong. Go to the page for users in United States.

都市感情實錄 ─ HR(下)

Steven冇再講任何野,轉身上的士就走,好快Leah連車尾燈都見唔到。其實點改,Leah一啲頭緒都冇。職場上,佢嘅角色一直都只係揀人、問問題、炒人,可能佢早就將呢個身份帶入呢段關係。

於是佢重新問自己:究竟呢個candidate係咪真係唔可以錯過?佢嘗試係個腦裡面將佢嘅requirements同Steven嘅CV擺埋一齊,佢諗落,其實好多條件都有齊:顧家、高大、上進……幾乎冇挑剔嘅空間,除左食煙之外。

但如果要Leah徹底地改,就好似要將成條沙中綫「砍掉重練」咁,唔係話唔得,但要極大工程。經過兩分鐘嘅考慮,佢決定咗要解決所有問題,上至沉降,下至螺絲帽。因為佢知道佢唔可以冇咗Steven,又或者佢唔會再遇到一個咁適合自己嘅人。

「天氣開始凍啦,記得著夠衫先出門😤」、「返到office未呀?」、「我哋晏啲一齊食lunch好唔好?」Leah第二朝嘅message。換嚟嘅只係三個藍剔, nothing more。

但Leah知道自己唔可以著急,都唔可以再睇心情做人,既然plan A唔得,佢決定行plan B。

當成班同事都出哂去食飯嘅時候,佢去咗一間Steven好鍾意嘅café買杯熱flat white,再送去佢公司嘅reception,交低咗就去買外賣返office食。

過左lunch hour之後,佢終於都收到Steven嘅message:「杯咖啡係你買嘅?」

就係呢一句,Leah知道佢仲有可能「重返議會」,而佢就隔左一陣先打:係呀。好唔好飲?

佢諗左一陣,決定換過個問題:「你今晚得唔得閒?我嚟接你?」

因為佢明知Steven唔會唔鍾意杯咖啡,如果佢咁問,就代表其實佢冇變過。

「嗯。」Steven答。

一路以嚟,Leah最討厭嘅就係個「嗯」字,係佢嘅世界入面,呢個字仲難聽過粗口,但箍煲嘅代價就係忍,所以佢只好吞左啖氣等收工。

「我就快收工啦,你到我樓下未?」Steven問。

「我要OT 一陣,做埋少少嘢先行得。你等等我好嗎?」Leah根本就唔洗OT,但佢始終唔想好似畀Steven食住咁,所以先呃佢,仲一早就已經到左Steven樓下,匿埋喺附近睇下佢有啲咩反應。

一如佢所料,Steven好自動自覺咁向佢公司嘅方向行緊。而佢就知道自己已經嬴咗一半。

即係佢根本就冇改變嘅必要,就好似港珠澳都已經通車一樣。

Leah加快腳步返去自己公司樓下,扮到好似已經等左一陣咁,當佢拎起手機打畀Steven嘅時候,佢就已經係轉角位出現:時間啱啱好。

就係咁,嗰晚佢地又和好如初,好似冇事發生過一樣,日子亦如常地過左一個星期。Leah仍然係做返自己,因為佢同政府一樣,都好願意聆聽市民嘅意見。直至有一日,佢收到Steven嘅一個message:

「我想要嘅其實好簡單,我只係唔想你日日都係度hea我,我唔想你嚟嚟去去都send嗰堆好似template咁嘅message去關心我。你成日叫啲人等消息就得,我唔想每晚收工同你report今晚食乜餸就唔得,點解你可以咁霸道?不過算啦,我已經畀左最後一次機會你。我以為你真係會改變,但到頭來都係我諗多咗,我哋唔好再見啦Leah。」

Leah望一望佢Whatsapp嘅contact已經變成一個灰色嘅人仔,而佢所打嘅電話都暫時未能接通。

佢就知道,今次唔再係佢炒人,係人炒佢。


圖片來源:《曖昧不明關係研究學會》

上回 ⏪

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Wantedly, Inc. (Hong Kong)'s job postings
4 Likes
4 Likes
If this story triggered your interest, go ahead and visit them to learn more