1
/
5
This page is intended for users in Hong Kong. Go to the page for users in United States.

Coworking Space最熱門嘅新工種就係你成日聽嘅...

撰文:Wantedly編集部

香港地人多地少,環境擠逼,衍生出好多特別嘅生活模式,例如近年出現嘅共居以及共享工作空間。而呢個地方又衍生出新嘅工種喎,咪就係Community Associate囉~

向世界發展的共享工作空間

Angie Wong, Head of People四年前加入the Hive,佢表示當年香港共享工作空間唔多,但呢間公司就特別吸引到佢。「我好鍾意the Hive,因為當時嚟講係一個好創新嘅Concept。」佢加入嘅時候父母都有擔心,因為傳統思想,希望子女加入銀行或者大企業,但Angie深深受到呢度嘅理念影響,加上當初一面試已經感受到老闆嘅熱誠,於是毅然加入。「我好想同對工作有熱情嘅人合作,同時都想見證住一間公司嘅成長。」

呢四年間,the Hive真係以平穩嘅步伐持續咁成長,由一開始喺香港發展,到而家亞洲唔同地區都有佢地嘅足跡,版圖擴展到日本、越南及曼谷等地方。

Angie Wong, Head of People, the Hive

Community Associate 並唔係靚靚哋坐喺度嘅接待員!

一個屋苑必須要有管理員,共享工作空間如是。the Hive近日就係尋找緊認真、肯學嘢嘅Community Associate加入幫忙管理空間。就咁聽你可能會覺得即係做接待員啦,但Angie就強調並唔係咁樣。Community Associate嘅工作大概分為4類,除咗一般客服,仲要搞Event、負責成個空間嘅營運同埋Sell客。Angie話:「唔係好似傳統嘅Receptionist靚靚地坐喺度就算,其實佢哋係一個Cool Role,好比呢個空間入面嘅眼睛同耳仔,要把關空間每一件事。」

Community Associate晉升機會都唔錯,當你做到上手之後,就有機會升做Community Lead,做嘅嘢都係大同小異,不過就要更加深入去了解成個空間嘅運作,從而去搞更多營銷活動。再進一級就係Community Manager,到時就需要管理成個團隊喇!

Junie (Community Associate, the Hive) 指做呢個職位一定要夠醒目先可以搞掂晒咁多樣工作!

大學學位同經驗唔係必要!

曾經就有租用嘅客人問佢哋:「到底你哋喺邊搵到呢班人才翻嚟?」足證佢哋啲員工都好高質。Angie坦言呢份工節奏係好快,「你會Involve喺唔同嘅工作範疇,每一日都過得好快。」佢都強調呢份工唔單止可以學到公司營運,仲牽涉到大量嘅溝通工作 — 學識點樣同人溝通,對於日後發展有好大幫助。

一般人都未必有相關嘅工作經驗,Angie就話經驗,甚至係大學學位對佢地嚟講都唔係最重要!佢覺得只要係認真同肯學習嘅人,都可以勝任呢份工。就好似上年先畢業嘅Junie本身都冇相關經驗,但憑著一份熱誠就加入咗the Hive,成為其中一位Community Associate。佢對工作嘅熱愛程度好高,就連Angie都對佢讚不絕口!

打風都返工?!放心...係自願嘅

共享工作空間開放,令租用人士有更多空間去交流同合作

就早排咋嘛,超強颱風「山竹」殺到之前,Junie自願返公司做防風措施,將庭院嘅傢私搬返入室內,你話幾唔話得先!Junie話:「我真係好在乎呢份工,呢個空間同埋喺呢度嘅Members,某程度上呢度就好似我屋企咁。」

其實Junie以前係Part-time補習老師,又曾經喺迪士尼樂園工作過,工作經驗大多都同小朋友有關,咁係咩驅使佢加入the Hive呢?佢就話做老師雖然都開心,人工都唔錯,但經歷嘅事每日都差唔多。相反喺the Hive每日都可以接觸到唔同嘅人,而且工作種類好多元化,比較有趣。

定時聚會了解大家

除咗對工作要有熱誠,佢哋都認為如果要勝任呢份工作,就一定要識同人相處,更加要有好好嘅團隊精神。點解Junie對工作咁有熱誠?佢解釋係因為呢度啲同事都係咁,大家嘅mind set都好相似,潛移默化之下都令佢更加喜愛呢份工。「我哋嘅團隊真係好好,甚至默契好到有啲嚇親我!呢啲都係我以前嘅工作搵唔到嘅嘢。」

如果你係好鍾意「對人」嘅工,咁呢個職位就會好啱你喇。Angie話:「我哋又唔係要求要超級外向,但至少要享受being around people。」另外最吸引嘅係成個團隊都好年輕,嚟自唔同背景,唔同性格嘅人都有。

成班同事一齊出席活動,係開心嘅!

點先可以加入the Hive呀?

因為接觸嘅客人好多元化,英文會係主要嘅溝通語言,所以自問英文嘞嘞聲嘅你,就絕對有著數~the Hive同多間本地餐廳同埋健身室都有合作,員工去食嘢同做gym都有折,一齊去做gym好似都唔錯!而且員工都好年青,相處起嚟都唔難,仲會好好玩!

「做Startup最好玩在於你永遠都唔知聽日會發生咩事,每一日都好刺激!」

❇️ the Hive招募中!

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
the Hive Hong Kong's job postings
6 Likes
6 Likes