1
/
5

Outward Bound:無論風浪幾大都撐住你

撰文:Wantedly編集部

對上一次訪問Outward Bound已經係上年年尾嘅事,上回講到因為疫情影響,所以一班instructor都冇得帶班。咦,咁點解仲請新一批instructor trainee嘅?

人才發展部主管阿平就話,其實大家都餓咗好耐:「上年因為Covid,大家都困喺香港冇得去旅行,變相多咗好多人接觸戶外運動,好似行山、爬艇等等。再加上小朋友上年又冇得返學,所以啲家長就更加想帶佢哋入嚟放電,體驗吓『另類』嘅教學。」原來香港人對外展訓練有咁大需求,唔怪得今年都keep住請人啦。

咁呢一年Outward Bound又係點樣面對疫情嘅影響呢?阿平就苦笑:「上年開到嘅班真係十隻手指數得曬,呢段時間我哋都keep住做internal training、facilities翻新、器材裝備嘅保養等等,亦都制訂咗好多應變嘅plan去應對唔同嘅情況。而家我哋已經準備好曬,ready好迎接嚟緊嘅programme!

既然Outward Bound已經慢慢咁回復返正常狀態,新一批「幼齒」亦早喺六月就入咗西貢大網仔嘅基地做training喇!當日小編入去搵呢批trainee做訪問嘅時候,佢哋其實已經執緊背囊,準備緊之後十日嘅Instructor Development Course。

呢6位trainee當中有人做咗幾年嘢,有人啱啱present完final year project (FYP),有人本來教游水,亦有人做開freelancer,點解會揀Outward Bound呢?等小編訪問吓呢班準備過十日「人在野」生活嘅trainee啦!

▲ 一入佢哋個dorm就見到呢個full到爆嘅training schedule,仲有呢個「肉體改造計劃」……換轉係小編,應該做完一set squat jump就要抖返一個鐘先……

日曬雨淋真係好好玩咩?

揀得入Outward Bound做trainee,佢哋當然本身都好熱衷玩outdoor活動。原來當中有幾位trainee係睇完Wantedly以前訪問Outward Bound嘅文,所以選擇咗呢個地方。

▲ 圖左起:Charlene、Berry、Cookie

嗰頭present完FYP,呢頭就入西貢做trainee嘅Charlene,原來中學就參加過呢度嘅18 Days Classic Achiever Programme:「中學喺呢度做participant嗰陣就發現自己好鍾意戶外嘅環境,仲喺日記上面寫『唔知將來有冇機會做返呢一行呢?』。就喺上年年尾見到Wantedly介紹Outward Bound嘅article,當年嘅想法又再彈咗出嚟,真係有緣!」

Berry笑住咁話:「其實我兩年前就睇過你哋啲文㗎啦!當時已經好想入嚟做trainee,因為我一直都好嚮往呢種生活。對上一年apply唔到,今次終於輪到我做trainee啦!」

同樣睇過篇article嘅Cookie都話:「我本來讀IT嘅,畢業之後都好順理成章地返IT相關嘅工,但嗰種生活經歷咗一年已經覺得夠曬皮。又咁啱喺facebook見到你哋介紹Outward Bound篇文,咁咪膽粗粗試下apply做instructor trainee囉。」

咁做開游水教練嘅Louis又點解會入嚟西貢嘅做trainee?Louis:「我本身都好鍾意同小朋友相處嘅,但做游水教練最多咪同佢哋對到一個鐘,其實建立唔到啲好深厚嘅關係。」咁Outward Bound又點呀?「呢度就梗係唔同啦!最短都對一日,好多時仲會對足成個禮拜,我好期待之後可以透過outdoor training去啟發啲小朋友!」

喺Outward Bound Training 最正嘅係咩?

▲ 圖左起:Louis、Karen、Richard

入咗Outward Bound都一個月時間,問到佢哋最鍾意呢度啲咩,Louis就笑住咁答:「一定係個海!我哋每日training完都會做recovery,喺海邊鋪張mat,吹住海風做yoga,有時仲舒服到喺海邊瞓著咗添。」以前已經會日日游水嘅Berry都話最鍾意個海:「呢度個環境真係好正,打開門就可以跑落去游返轉先,呢種生活唔係度度都搵到㗎。」

除咗個海之外,Louis話最正嘅都係身邊多咗班同伴:「大家一齊住、一齊做運動,日對夜對變得好團結!爬完艇覺得唔夠喉?郁啦,再去跑返轉先再講!」

「每日嘅training唔單止係train hard skills、學識點樣爬艇,仲可以慢慢建立teammate關係。每晚我哋都會喺廳度播住歌、做自己嘢,溫緊書有嘢唔明就可以即刻問佢哋。」Karen都好鍾意呢度嘅team spirit:「身邊多咗五個人同自己一齊經歷呢一切,感覺真係好好。」

而做過3年auditor嘅Richard就覺得最正嘅係每日都有新嘢學:「同以前坐office計數計到天荒地老嘅生活真係好唔同,喺呢度每一日都係唔同嘅體驗。」喺Outward Bound會唔會見少咗屋企人? Richard話正正相反:

「 以前不停地OT、計數、公幹……雖然日日都會返屋企,但凌晨三、四點佢哋都一早瞓咗,根本無時間好好相處。而家話就話成日流落『荒島』,電話都用唔到,但每星期都會返屋企,反而多咗時間見面添。」

咁多地方可以揀,點解揀Outward Bound?

曾經喺其他地方做freelance outdoor instructor嘅Karen話,Outward Bound同出面好唔同,會令佢多咗好多思考嘅空間:「呢度學嘅嘢比起出面學嘅嘢會再深入啲,好多時都會令你重新思考每個動作、每個equipment嘅setting,背後有咩目的同作用。」

上過其他course嘅Berry即刻點頭:「出面會比較著重hard skills嘅training,但Outward Bound好強調一點,就係想我哋喺outdoor嘅過程學習唔同嘅soft skills,例如點樣面對突發情況等等。」Berry以前讀嘅中學同Outward Bound一樣,都係用experiential learning嘅教學模式:「Outward Bound同我嘅想法好貼近,令我好想喺度用呢套去教日後嘅participants。」

Cookie就話:「Outward Bound同其他學校唔同,出面多數都係收學費,training完再請你做instructor。呢度唔單止冇收費,training時間仲相對長好多,所有training都係step-by-step,所以個training path比起其他學校會明確好多。」

▲ 原來kayak係有分sit-on-top同sit-in兩種㗎,唔做運動嘅小編又學多咗嘢!

「荒島求生記」前傳

訪問完嘅第二日,6位trainee就要出發去體驗十日嘅Instructor Development Course。頭五日將會係hiking,路線由Training Instructor Shaik plan畀佢哋,至於剩低五日就係佢哋自己plan嘅kayak之旅。呢十日咁多未知數,各位又對呢個adventure有咩期望呢?

Charlene就話到呢一刻都未知行山路線、時間安排,點都有少少不安:「始終好多嘢都唔會預計到,好多嘢都唔知應唔應該帶,又好驚會執漏啲咩嘢。」Cookie就搭住Charlene膊頭講:「真係帶漏咗咪問我哋借囉!」無錯,身邊有班人傍住你、互補不足㗎嘛。相信teammate,唔驚!

之後Cookie再補充:「個心點都有啲緊張嘅,但我又好期待喺呢個adventure裡面同大家製造多啲難忘嘅回憶。」

至於Richard同Louis都好想透過呢趟未知之行,重新認識自己同埋身邊嘅人:「當人去到唔熟悉又或者充滿挑戰嘅環境嗰陣,往往都會發掘到自己內心最真誠嘅想法。希望喺呢個中期check-in,可以同呢班人一齊重新認識自己!」

Louis:「雖然已經朝夕相對咗個幾月,但我諗training同喺野外可以帶畀我哋嘅嘢都好唔同。我諗經歷完十日之後,大家嘅關係會再close啲,同時都可以好好發揮學過嘅嘢!」

▲ 數數手指,呢篇文出街嘅時候,佢哋就啱啱玩完「人在野」返到Outward Bound基地。唔知佢哋有冇實現到自己當日喺訪問所講嘅嘢呢?

望住呢班同小編差唔多年紀嘅trainee,真係好羨慕佢哋擁有呢種「出生入死」嘅同伴。諗諗吓,其實人生就同佢哋喺度training咁,只要身邊仍然有一班人喺背脊back up住自己、共同進退,無論前面幾大風浪都好,都一定撐得過嘅!

後記:當日小編八卦問咗句,喺Outward Bound呢一個月最有趣嘅事係咩嘅時候,Karen即刻笑到收唔到口:「趣事就日日都有,但有一單真係好好笑……」等Karen笑完,佢又繼續講:「有日我哋練緊獨木舟,見到海面有碌棍伸咗出嚟,本來以為係附近有人snorkeling,點知望真啲係個廁所泵!最好笑係我哋拎住個廁所泵都玩咗一日……」講完Karen又繼續笑啦,原來開心真係可以好簡單。
▲ 你睇,Karen未講就笑咗先,你就知佢哋喺Outward Bound過得幾開心啦!

✨仲諗緊自己啱唔啱同佢哋一齊上山下海?嚟緊info day就入去西貢大網仔基地瘋狂問佢哋問題啦!✨

Outward Bound Hong Kong's job postings
12 Likes
12 Likes
If this story triggered your interest, go ahead and visit them to learn more