This page is intended for users in Hong Kong. Go to the page for users in United States.

【100日訓練實況】一份會令你笑成「咁」嘅工

撰文:Wantedly編集部

唔知大家有冇以下呢個想法,就係出咗嚟返工之後,已經好少嘢會令你覺得好有衝勁。但當筆者去完Outward Bound,訪問完呢幾個進行緊「100日訓練」嘅後生仔女,先發現原來打一份工都可以好有意義,好「熱血」。

圖左至右:Peter, Kaycee, Karen, Avis, Rocky, Anson

出面咁多野可以揀,點解係要揀Outward Bound?

喺呢幾個後生仔裡面,有fresh grad、有做咗幾年嘢;有做過懲教、又有做過裝修,可以話係「五色戰隊、應有盡有」。但點解佢哋會揀入嚟Outward Bound做outdoor instructor呢?

「鍾意大自然囉!」Karen諗都唔諗就答,但個原因又邊止咁簡單:「畢業之前做過唔同機構嘅intern,真係覺得好唔適應,冇嘢做又要扮有嘢做,佢哋又淨係要你交啲用新細明體整出嚟嘅poster。」

同樣做過intern嘅Peter即刻點哂頭咁補充:「嗰陣intern學得最多嘅就係沖咖啡,食完lunch就對住電腦手機1個鐘,跟住就會用2個鐘去斟咖啡,呢個手沖啦、跟住壓落去啦、呢個㩒個制要磨豆啦…最後再坐多1個鐘就收工。」

做過懲教嘅Avis又點諗呢?佢就話辛苦分別有兩種:幸福嘅辛苦/痛苦嘅辛苦,而當初「裸辭」嘅原因就係想離開嗰種痛苦嘅辛苦:「我唔係好適應懲教嘅training方式,同呢度(Outward Bound)好唔同。我第一日返工坐低嘅時候,就已經picture到自己之後嗰三十幾年嘅生活係點,每日都係大同小異。」

或者有人會覺得「高薪、厚職、鐵飯碗」代表嘅係:舒服、中產、人生嬴家,但其實我哋嘅人生意義又係咪淨係咁?

100日training概覽

真係遊山玩水咁簡單?

大家見上面張圖都應該估到,除咗理論課之外,基本上其餘時間都係expedition,或者要你落手落腳做training,但點解咁著重「山水」同埋「實戰」呢?原來對於Outward Bound嚟講,山水係一個教育同學習嘅媒介。

一直有教開琴嘅Kaycee就話:「呢度嘅教育同以前嘅好唔同,例如我教琴係要幫小朋友玩好啲樂器、考到個試;學校讀書係要考到好成績,但呢度強調嘅係『經驗學習法』(experiential learning)。」

相信大家(包括筆者)對呢個term可能會有啲陌生,而當時Rocky就咁解釋:「呢度都會有technical嘅理論要學嘅,但就唔會好似上堂咁上,而大部分時間都係想你『落手落腳』去感受吓件事。例如可能會要我哋『圍內』帶吓game,出海之前要觀察吓個海嘅水流同埋風向,畀我哋知道做起上嚟係咩感受,而唔係純粹『死讀書』。」

其中一個教練仲同佢哋講過:「Nothing will happen without fun,只要你enjoy就會慢慢學到嘢。」如果香港嘅教育制度有參考Outward Bound的話,或者而家啲小朋友嘅童年會好過得多。

當然啦,遊山玩水都要付出代價嘅,就好似Karen講咁:「呢邊通常每日都係朝早6點起身,做少少體能,食個早餐就開始一日嘅training,多數5點之前就完哂所有training。初初梗係唔慣啦,但過咗一兩個禮拜就已經習慣咗好多。」佢仲覺得而家每日都多咗好多時間用,夜晚又可以喺basecamp唱吓K,玩吓結他,其實成個感覺好舒服。

筆者一聽到每朝要6點起身,都即刻打咗個「凸」,但點解佢哋都仲留緊喺Outward Bound?除咗鍾意Outward Bound畀到佢嘅lifestyle之外,Karen仲話:「因為城市內嘅工作更加『惡啃』。」

如果畀你揀,你會想日日返工都對住後面個景,定還是抬高頭淨係見到啲樓?

“You have more in you than you know”

Anson對另一個導師講嘅呢句說話好深刻,因為:「好多時你以為自己做到盡,但原來當你肯再行多步嘅時候,就會發現自己其實可以做到更多。」

同一時間,呢件事唔一定只係發生喺佢哋自己身上,Kaycee話喺其他人身上都可以:「初初點解認識Outward Bound其實係因為爸爸,佢本身隻腳唔係咁好,連行路都有困難,但佢無啦啦join咗Outward Bound個adaptive journey,我嗰陣仲以為佢去咗旅行,點知返到嚟好開心咁話自己係第一個隻腳唔好但爬過個繩網嘅人。」

就係因為咁,Kaycee就覺得原來世界上有份工,係可以帶到一份咁嘅成功感同滿足感畀人:

「嗰陣開始覺得做教練真係好型,同我之前教音樂好唔同,發現原來擺一個人喺大自然入面學到嘅嘢仲多,而嗰份成功感同滿足感唔止係畀咗人哋,同時都畀埋自己。」

講到教練呢回事,Rocky就正正係畀Outward Bound嘅人吸引住,就好似訪問前一晚,佢哋班staff自己搞咗個sharing,一齊brainstorm有啲咩新idea可以加上去啲course度:「呢度好著重個educational outcomes,所以大家都好有心去tailor-make唔同嘅活動,而唔係不停loop啲『硬磞磞』嘅programme落唔同人度。」

Karen就補充:「有啲教練用過《三隻小豬》做主題,有啲會玩cosplay,有啲又試過加入電影嘅元素,試過好似係《命運自選台》(Click)咁,每晚完哂活動都會同大家一齊rewind吓個人生,引導大家reflect吓有咩覺得可以做得更好。」

筆者見過好多類似嘅comment,都係話:「搵工邊有鍾意唔鍾意㗎?」、「邊個會對自己份工作有興趣㗎?」……冇錯,可能香港嘅風氣、好多公司、好多工作都會畀人一個咁嘅印象,但又代唔代表完全冇希望呢?定還是其實每個人都有得揀,而搵唔搵到就只係睇自己?

後記:Avis提過話之前份工好有階級觀念,但嚟到呢度之後,有上司會主動斟咖啡畀佢哋飲之餘,仲因為有個senior知佢英文唔係咁好,打算搵自己做老師嘅外籍太太嚟同佢補習。假如出面一般嘅公司有嘅係階級觀念的話,Outward Bound有嘅或者係「反階級觀念」。

救命呀!Outward Bound請緊人呀!🤩

除咗㩒"Want to Visit"之外,記得mark低埋下面嘅日子,同留意住Outward Bound喺呢度嘅update呀😉

🔹Information Day:2019年7月28號

🔹Selection Day:2019年8月10號同24號

🔹Start of Training School:2019年10月8號

未睇過佢哋之前嘅訪問?🤨

Outward Bound Hong Kong's job postings
8 Likes
8 Likes

Weekly ranking

Show other rankings
If this story triggered your interest, go ahead and visit them to learn more