This page is intended for users in Hong Kong. Go to the page for users in United States.

有份工⋯⋯陪你走過人生同現實中嘅高山低谷!

撰文:Wantedly編集部

唔知大家身邊有咩可以激勵你嘅嘢?係一本書、一位偶像,定係一套電影?其實香港有好多人都努力為社會帶嚟正能量,希望以生命影響生命,今日要講嘅就係Outward Bound嘅導師。佢哋除左喺戶外活動嗰陣guide住學生,仲希望學生從中學識堅持同合作,突破自己!

你以為你係導師?其實你係導演呀!

任職Grade 1 Instructor嘅Jackie Fung已經喺Outward Bound做咗4年,佢加入呢度之前負責喺中學講talk。「當時我覺得睇唔到學生成長,回想起之前去過Outward Bound,而我又鍾意outdoor,所以就轉咗呢份工。」而Grade 2 Instructor 嘅 Vincent Lam早在小學時已經去過Outward Bound。「細個覺得去係去玩,回頭睇返先發現獲益良多,例如學識團隊精神。」於是佢大學畢業就一心要做導師,仲考埋急救、拯溺嘅牌照,好好裝備自己。

Outward Bound嘅課程一般會喺野外進行,有好多有挑戰性同激勵身心嘅活動,例如行山、划艇同出海,要參加者從中尋找同突破自己。作為導師,佢哋最主要嘅工作就係帶班,另外有時都要留喺營地做support,再加少量嘅paper work。

Jackie(左)同Vincent(右)都認同喺Outward Bound做導師係一種生活態度。

帶班嘅時候佢哋要陪學員接受戶外挑戰,每晚再同佢哋反思當日發生過嘅事,希望大家從中得到啟發。即使課程活動大致上相同,參加者性格、天氣等因素都會影響到每個課程,所以每次都係獨一無二嘅旅程!佢哋每次出發前都要設計課程,Jackie仲話呢個職位最特別嘅係好似導演咁一開始編晒成個劇本,但又要根據實際情況去不停咁改個劇本。改黎改去,講到尾都只係想學生得到啟發。

Vincent話呢份工最有挑戰性嘅唔係日灑雨淋,而係點樣令到參加者可以有所得益。「如何設局令佢哋覺得impactful係最好玩嘅地方!」佢仲話自己每次準備帶班之前都會好興奮。「想睇下呢班未見過面嘅學生會唔會因為我設計嘅課程而受到啟發!」

參加者要上山下海挑戰自己!

係生活態度而唔係一份工!

呢份工聽落好似「人生導師」咁,其實得益嘅唔只係參加者,有時佢哋都可以從學生身上學到好多。例如Jackie帶過一班全女班戒毒人士,佢哋全程都好和平,遇上問題會一齊祈禱同唱詩歌:「比起教練,我更似係同行者!係佢哋教返我嘢!」呢班女仔之後搵到工都有通知Jackie,令到佢覺得好安慰。又或者有啲小朋友完咗個訓練同佢哋講:「This is the best day of my life!」,令到佢哋真係覺得好有滿足感。

開心嘅時間佔多數,但總會有啲經歷唔係咁愉快。Jackie試過帶一班喺中途宿舍住嘅青年,頭幾日大家都好團結,點知去到中段就因為攰而慢慢展現真本性,最後為咗幾粒花生(冇錯,係真嘅花生)而拎起鐵通差啲打交,其中一個人仲嬲到燒咗張地圖!最後,原定18日嘅旅程冇順利完成,但都令Jackie反思佢哋有咩可以改善,演變到而家Outward Bound會請心理學家同社工幫一班導師上堂!所以話每一次帶得班唔單止學生有得著,導師都進步緊。

有啲望住咁靚嘅景嘅宿舍同Campsite,真係可遇不可求呀

佢哋兩個都話有時都會覺得好攰,好想放假。Jackie話:「呢個係lifestyle,唔係一個job,帶班係冇off嘅狀態。」而最大影響就係冇時間陪屋企人同朋友。「朋友生日、結婚,唔一早請假就好可能miss咗,而平日嘅興趣都未必可以繼續。」兩位嘅父母都唔係特別支持呢份工,成日叫佢哋去考公務員,但佢哋依然堅持繼續做落去,全因做呢份工真係有好大滿足感同可以為其他人帶嚟轉變。

可以一齊分擔生活嘅同事

Jackie話一直令佢留喺度嘅動力係「人」。首先係有一班好同事,即使興趣好唔同,大家都好熱心同善良,有人搬屋仲會一齊去幫手!「我見佢哋多過見屋企人,我哋喺度住,喺度做嘢,所有嘢都一齊,有咩都可以一齊分擔。」另外,帶班嘅時候,Jackie會覺得學生都教緊佢嘢:「老土d講句,其實咪就係生命影響緊生命」。

而Vincent嘅動力就更遠大-係夢想。佢希望參加者每次玩完Outward Bound,唔單止帶走技能上嘅知識,更重要係心靈上嘅啟發。佢話:「我相信自己可以為身邊嘅人帶來改變,如果可以俾多少少正面影響俾其他人,其實成個世界就會改變好多。」

呢張相唔知點解有啲家庭照feel (?)

呢份工好似圍村咁,大家住埋一齊,又包食住,唔使日日坐係office咁悶,仲有機會去其他國家既Outward Bound中心度交流!而家佢哋都請緊Outdoor Instructor,唔需要超鍾意戶外活動,而家有好多導師都係「文青」,最重要係唔怕試新嘢,肯去冒險。Vincent都話呢份工唔係每個人都做到,但只要有心去計劃每個課程,有熱誠去為學生帶嚟改變,都可以試吓apply!

其實Outward Bound課程就好似我哋一生咁,中間一定會有啲好攰、好想放棄嘅時刻,不過如果肯咬實牙關,最後回頭睇一定會好慶幸自己當初堅持,最後先睇到咁靚嘅風景!

❇️ Outward Bound招募中!

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Outward Bound Hong Kong's job postings
5 Likes
5 Likes

Weekly ranking

Show other rankings
If this story triggered your interest, go ahead and visit them to learn more