This page is intended for users in Hong Kong. Go to the page for users in United States.

靠對波鞋就可以解決人口販賣!?

撰文:Wantedly編集部

“One Step Goes a Long Way”,Lacess呢句tagline有冇令大家聯想到「月球一小步,人類一大步」呢?但對佢哋嚟講,只要每個人肯去行多步,個世界就會因為咁而慢慢改變,於是Natalie同Simon兩夫妻就選擇造自己嘅鞋,同大家一齊行更遠嘅路。

▲由於佢哋只係launch咗幾個月嘅關係,暫時只係得女裝咋,各位男士們要等等了(筆者都一樣……)

「人口販賣vs人血饅頭」

今年5月先正式launch嘅Lacess,點解會想解決人口販賣呢個問題?都係因為Natalie自己嘅「私心」:

「原因有幾個嘅,首先人口販賣其實係全世界第三大嘅crime,但好多人都唔知道呢件事;同埋human trafficking好大個drive係源自我哋,例如你每日飲嘅咖啡、著嘅衫,佢哋點樣生產、究竟間工廠係咪ethical,其實係好直接影響human trafficking嘅demand;最後其實係我以前去印尼旅行嘅經歷,見到好多『童工』連自己嘅生活都冇得選擇,而且絕大部份都係女仔,就令到我更加想去出一分力,解決呢個問題。」

呢個時候有人可能會諗:個個都係得把口㗎啦,到最後咪又係想搵錢。但事實係,每當Lacess賣出一對鞋,佢哋都會將一部分嘅收入捐畀一間叫Compassion First嘅NGO,而呢間NGO由2007年開始,就一直努力咁去打擊人口販賣,仲會做唔同嘅相關工作,例如照顧一班佢哋救咗出嚟嘅小朋友、提供法律支援、教育工作等等。

▲點解Lacess嘅logo係5粒點,原來靈感係嚟自大家細細個都應該玩過,順次序「連點點」就會有個圖案出嚟嗰本簿。

Lacess = A Leap of Faith

一畢業就做marketing嘅Natalie,喺搞Lacess之前已經喺beauty industry有過10年經驗,明明就舒舒服服嘅「中產」生活,又點解會咁「衝動」跳出嚟搞自己嘅sneaker brand呢?

「有一日開開吓會我就望一望成張枱嘅同事、高層,我個腦忽然間講咗句:我唔想變成佢哋咁。 」

就係因為咁,Natalie就決定放手一搏,得就得,唔得都至少唔會後悔冇試過。

▲當Natalie諗返過去咁多年嘅工作,佢又得出啲咩結論呢?

「其實真係好慶幸之前嘅公司都畀好多機會我去試新嘢,但因為beauty呢一行其實真係好浪費,我成日都會諗究竟一個人,究竟係咪需要有咁多支唇膏呀…眉筆呀…諸如此類呢?」Natalie仲話試過「倒自己米」,叫啲客唔好買Lacess:

「因為我好想大家都可以shop consciously,即係你明明已經有對白色波鞋,而佢又冇穿冇爛,咁點解又要買多對呢?我覺得,我哋已經為呢個世界製造咗太多垃圾,所以我想可以為呢個問題帶嚟少少嘅改變,最起碼令大家aware多少少呢個世界存在嘅問題。」

▲一講到想請啲點嘅人,Natalie同Simon都即刻好興奮,唔通佢哋好期待呢一班「電燈膽」?

「我咩都想要!」Natalie第一句就笑住咁講:「咁啦,我覺得好肯溝通係最緊要嘅,因為我個人好直接,有啲咩就會講出嚟,但我發覺好似好多香港人都唔太會同人哋confront,好多時都好passive。」

筆者即刻諗起以前嘅公司,其實好多時都係上司掉咩落嚟,你就硬食啲咩㗎啦,邊有人敢頂撞老闆㗎……

Natalie就話:「所以點解startup同corporate咁唔同,係因為喺一間startup裡面真係可以冇階級,因為大家都係想為件事好,所以我都唔介意啲同事有咩都拎出嚟講,再加上我唔鍾意micro-manage人,所以當你去做某啲task,見到有啲咩問題,你唔講人哋又點會知呢?」

Natalie亦都補充咗句:「辛苦就一定㗎啦,但我會諗嘅係辛苦得值唔值得,開唔開心。尤其是喺startup做嘢,真係咩都要落手落腳做,變相你會好快就學到好多新嘅嘢,even我做咗咁耐marketing,我而家搞Lacess都覺得好challenging。」當Natalie講完呢句嘅時候,佢唔單只冇任何攰嘅表情,反而笑得好開心,或者呢個就係Lacess畀到佢嘅意義。

要改變世界,用把口講從來都好容易,但當你要實踐嘅時候,就只能夠一步一步咁行,而每一步都相當困難,如果你都想take呢個step,嘗試用唔同途徑去解決身邊嘅問題,Lacess又會唔會係你嘅選擇?

後記:有冇發覺成篇訪問裡面,Simon都好似冇乜點講過嘢呢?事關佢係Natalie背後嘅男人,一開始已經話technical嘅嘢先會幫手答,但問到Lacess最後嘅終極目標係咩,佢就有一個好簡單又遠大嘅總結:「我會想如果有一日,你喺條街度問人:最出名嘅sustainable波鞋brand係咩呀?然後有人會講Lacess呢個牌子。」

Natalie仲會出席Wantedly成立嘅【CV調查委員會】喎!你唔係唔嚟呀嘛?

Lacess's job postings
1 Likes
1 Likes

Weekly ranking

Show other rankings