1
/
5
This page is intended for users in Hong Kong. Go to the page for users in United States.

邊有公司唔畀人OT㗎?

✨ 嚟到都係想搵份好工姐,即刻click呢度睇吓有咩啱你啦!✨

撰文:Wantedly編集部

大家冇睇錯,喺香港地的確係有公司唔准員工OT,而其中一間就係KKday。上次Rebecca就分享咗佢嘅管理哲學,今次就搵嚟KKday嘅Marketing Communication Executive Cony Mok以「small potato」嘅身份大爆KKday內幕!

「橫死掂死,裸辭罷就」

Cony一直都係做開傳統大公司,仲要全部都係人哋refer佢去做,所以KKday係佢第一份自己搵嘅工:「嗰陣時其實一直都想走好耐,公司文化傳統就一定㗎啦,做咩都要跟足規矩,又要跟dress code返工,成件事都好『死』,仲要差唔多每日都要OT兩個鐘咁濟。真係跟又死,唔跟又死。」

所以當時Cony一見到KKday請人就即刻「裸辭狗衝,打死罷就」。當然啦,佢嗰陣時都有考慮過嘅:「我一睇哂所有嘢就覺得好完美,無論係工作性質、company culture、定係industry都好。同埋KKday又係一間比較大嘅startup,起碼唔洗擔心冇糧出先啦。」

其實嗰陣Cony都驚㗎,但見完工之後就知道自己冇睇錯:

「見工個感覺同之前嗰啲差好遠,之前試過in某啲大公司會不停講公司好多福利,又會test你打字速度,叫你用3種語言答同一條問題咁,真係誇張到你唔信。」筆者當時聽完都忍唔住打咗個冷震。

福利都有分「軟硬」?

入咗嚟KKday半年時間,Cony就話同佢未入嚟之前嘅想像係幾乎「零出入」:「喺呢度做嘢自由度好大,只要自己有idea就可以去做,當然如果做『衰』咗要自己負責,但都好過啲大公司做完『假咨詢』,到頭來都係聽哂佢哋話。」佢自從入咗嚟之後,好多時上司會畀自己做決定,例如同邊個KOL合作、接唔接受啲partnership咁,成個感覺好「爽」。

至於福利方面又點呢?Cony就覺得「軟」福利吸引過「硬」福利好多,而好多都唔會好似花紅同大假咁白紙黑字,因為前者係由公司文化延伸出嚟:

「喺呢度做嘢做到攰又可以落樓飲杯咖啡,抖完先返嚟做;夠鐘就一齊準時收工,T都唔畀你O。簡單啲講就係『工作時工作,遊戲時遊戲』囉。」

但KKday又係咪真係咁完美呢,咁梗係唔係啦:「第一樣一定係公司啱啱搬新office,有時其他公司裝修嘅時候會嘈到『頂唔順』,嘢都做唔到。如果講自己嘅話,會想有多啲機會試吓product development嘅工作,做多啲唔同嘅project。」

Cony仲話KKday其中一個最貼心嘅「福利」,就係可以畀你識好多出面唔同嘅人,幫公司做嘢之餘仲可以build自己嘅connection,真係會有嘢攞得走,而唔只係CV上面嘅字。

唔知由幾時開始,上網時不時都會見到同comfort zone有關嘅topic,但原來好多時,只係需要踏出第一步,之後就自然會知道要點行落去。

後記:訪問完咗之後,筆者好奇問Cony當時點解咁大勇氣「裸辭」,佢好輕描淡寫咁解答咗個問題:「既然返咩工都會辛苦,點解唔搵份自己鍾意嘅去做?」其實好多時你只要踏出咗第一步,就會發現原來「船到橋頭自然直」。

✨ 嚟到都係想搵份好工姐,即刻click呢度睇吓有咩啱你啦!✨

KKday (Hong Kong)'s job postings
6 Likes
6 Likes