This page is intended for users in Hong Kong. Go to the page for users in United States.

Movie6:成間公司都係「白痴」!

撰文:Wantedly編集部

只要你有睇過吓戲,你點都會用過Hong Kong Movie個網或者個app,今次搵到佢哋呢班「大紅人」傾偈,筆者決定起哂佢哋底,睇吓間公司裡面究竟係點!

或者喺開始之前幫大家搞清楚個關係圖先啦:Hong Kong Movie呢個app其實係Movie6呢間公司嘅產物,而Movie6就係係大名鼎鼎嘅app solutions公司──GreenTomato (GT Studio)旗下嘅子公司,而GT Studio仲有好多唔同嘅project㗎,例如負責講故事嘅tbc同幫大家搵嘢玩嘅Timable等等。

▲ Jason – Assistant Technical Manager(左)、Hason – Product Manager(右)

「最開心係見到個impact」

唔好睇佢哋兩個咁後生,但原來喺Hong Kong Movie已經做咗幾年,明明有咁多選擇,點解要留喺Movie6呢?

「其實留意咗呢間公司好耐,講緊我第一次買iPhone係09年,跟住就裝咗呢個app。」Jason諗返起以前:「後尾真係入到嚟做iOS developer,發現個app真係好多user,變相佢哋真係會見到、用到我做咗出嚟嘅嘢,又會畀返d feedback我哋去update,所以好有成功感。」

佢仲話每次update嘅反應都好直接,好嘅嘢多人用,唔好嘅嘢就自然冇人用,好似個app最近開始畀user share每場戲嘅seating plan:「我本身都唔諗住有人用㗎,點知整咗出嚟又見到好多人鍾意呢個feature,所以會好直接見到個impact。」

▲你估「IT狗」就淨係對住部電腦呀?連符都識畫呀!

至於讀BBA出身嘅Hanson又點呢?佢最鍾意嘅原來係個老闆(唔係擦鞋㗎!):

「老闆耐唔耐都會落嚟呢度睇吓,問吓我哋有冇新idea呀、點解唔做呢個feature呀、應該要點呀……但去到最後都係我哋條team自己決定點做,所以呢度個自由度好大,唔係上面落order你就要咁做,老闆都只係一個畀suggestions嘅user。」

點解佢哋咁value user feedback,甚至老闆都只係一個user呢?因為佢哋嘅philosophy係去收集每個用家畀佢哋嘅意見,包括佢哋條team每個人都係Hong Kong Movie嘅user,佢哋唔會因為自己係developer就凌駕其他users畀佢哋嘅comments。

咁問題就嚟啦,佢哋又係user、又係developer,咁先可以「突破盲腸」,將自己抽身去睇每一個update好唔好呢?Hanson好簡單咁答:

「最緊要係每次test新feature嘅時候都當自己係一個白痴,就算你完全冇用過個app,都會識得用個新功能,咁就係成功嘅第一步。」

佢仲話同事同公司嘅環境都好舒服,大家都會有傾有講,仲成日十幾條友出去食飯,筆者「當堂」打咗個突,喺觀塘有乜可能做到呢件事,Hanson笑一笑:「最緊要係天時、地利、人和……其實只係因為我哋慣咗2點半先食飯,過咗peak hour其實唔係咁難。」

▲唔知大家鍾唔鍾意飲Asahi呢?(p.s. 擺低「一舊水」嗰個同事唔知醉咗未…)

「做哂啲嘢就ok!」

點解Hanson會咁講呢?因為筆者幫大家問咗Movie6嘅返工policy係點:

「呢度就唔使打卡嘅,正常返10至7,但返工時間就比較flexible,因為大家都agree只要做得哂啲嘢就ok。」Hanson仲話:「最緊要係同事有問題嘅時候會搵你,唔好『冇尾飛陀』就得。」

就係因為一班同事都咁有責任感,所以就算佢哋星期六、日唔使返工,但一發現有bug,啲同事都會自己主動fix咗佢,因為weekend就係最多人睇戲,最多人用佢哋個app嘅時候。

咁除咗責任感之外,仲要有啲咩條件先可以入到去Movie6呢?佢哋兩個都覺得「有主見」同「誠實」好重要。

Jason話:「最緊要係知自己做緊啲咩,個目標同target係啲咩,例如你係想個app多啲人用嘅,咁我哋planning嘅時候點都有唔clear嘅位,developer其實係要提出呢個做法可能有啲奇怪,會唔會用另一個方法好啲呢?」

Hanson就咁講:「我哋條team其實都唔係好大,好多嘢我哋由零開始到出街其實好快,可以有好多錯嘅嘢會發生。例如個idea係我諗出嚟嘅,但可能developer做到一半就發覺件事係唔work,只係我一廂情願覺得呢條『橋』會得,咁就要聽一班同事講完之後,好誠實咁承認自己做咗個錯嘅決定。」

講起誠實,Jason仲有個「貼士」想畀大家:識就話識,唔識就話唔識,千祈唔好怕講,更加唔好唔識就扮識。因為唔識係可以教,但如果你扮識但又做唔到,其實成件事會更差。

▲佢地公司裡面仲要有自己嘅café,然後筆者飲咗杯flat white,真係好好飲……(照片由同事提供,事關筆者當時掛住飲咖啡,冇影到相)

讀physics都可以入嚟做?

冇錯,Hanson的確係咁講,甚至讀maths同design都入咗嚟做同事,因為佢哋最睇唔係經驗,佢哋仲即刻捉咗個讀physics出身嘅同事入嚟同筆者吹兩句!

▲由於嗰位同事比較怕羞所以大家係唔會見到佢㗎啦,有興趣可以係上圖搵搵~(嘩…個office大到咁…)

呢位同事叫Christina,喺Movie6做咗1年幾嘅Project Executive,佢就覺得Movie6畀同事嘅freedom都有好有唔好:

「因為我要安排班同事每個星期有咩task,仲要keep track佢哋做成點,所以成日都要睇住佢哋,但有時啲同事可能前一晚太chur自己,第二日12點幾先返到,變咗我又要等佢哋返到嚟先update到。不過好彩佢哋都會搞掂哂啲嘢。」

被問到呢年幾Movie6有啲咩改變,佢就咁答:「欸…冇乜點變喎…都係咁?人多咗啲…忙咗啲…咁上下?」

好似「五十年不變」咁,有人好怕改變呢件事,亦有人覺得改變係好事,但筆者相信就算你唔求變,佢都會自己「搵上門」。如果你想自己嘅人生有啲唔同,或者Movie6會係你嘅出路都未定。

後記:Hanson唔講都唔知,原來Hong Kong Movie喺十幾年前,只係GreenTomato嘅一個「project仔」,點知而家搞到咁大。所以話,有啲嘢你唔去試,又點知個結果有幾「估你唔到」呢?

你想入去飲Asahi定「Movie6限定」咖啡呀?😋

Movie6's job postings
7 Likes
7 Likes

Weekly ranking

Show other rankings