This page is intended for users in Hong Kong. Go to the page for users in United States.

要人有人,要假有假嘅公司?HK Express 撐住你!

撰文:Wantedly編集部

相信大家對HK Express一啲都唔陌生,就算未搭過都一定會聽過佢哋個名,但大家又有冇諗過,原來呢間公司會出錢、出人、仲出埋假去撐住班同事做義工!

▲聽吓班靚女同事做義工嘅經歷先~(左至右)Suey、Heidi、Sophie、Fiona、Alison、Irene

「公司最想自己做義工!」

話說HK Express喺兩年前成立咗Corporate Social Responsibility (CSR) team,咁呢條team即係全職喺公司做義工呀?

「揸fit人」Fiona就咁講:「梗係唔係啦,HK Express其實不嬲都有giving back嘅initiative,但係透過成立CSR Team,希望回饋社會唔單止係公司嘅事,而係將呢個idea由公司裡面promote,令到多啲同事可以接觸social service,甚至主動去參與義工活動。所以同事只要參加過CSR team嘅義工活動就會係條team嘅一份子。」

HK Express有幾想同事做義工?以上年搞嘅雲南義教活動為例,公司出食宿,出機票,仲出埋假(即係唔使用AL!),即刻吸引咗公司嘅空姐呀,HR呀,accountant 等等...搭廿幾個鐘飛機同巴士,去啲落後地方做義教!

做空姐嘅Suey就咁講:

「我本身就要飛嚟飛去,好難夾到出面做義工啲時間。所以好難得公司會搞義工活動之餘,仲畀假期畀錢自己去做義工。咁啱我本身又好想去啲落後地方服務,所以嗰陣就即刻報名。」

平時少啲做義工嘅代表就講完啦,咁做咗St. John義工成10年嘅Alison點呢?「其實我係有潔癖㗎!所以開頭都有啲掙扎,不過難得公司咁有heart,而且喺香港通常係帶青少年活動,同喺落後地方生活嘅小朋友好大分別,所以好想自己去體驗吓,希望盡最大努力幫到班小朋友。」

講到呢度,Heidi就話自己有好深嘅體會:「雖然班小朋友都係小一、二學生,但已經好生性,食完飯又會搶走啲碗去洗,再睇返香港嘅小朋友或者自己,真係幸福好多。」

至於Irene同Sophie都因為班小朋友而覺得好impressed:「可能因為佢哋平時唔會有老師,所以我哋一去到就好畀心機去學。同時間你就會反省返呢個社會嘅問題,同埋自己有幾幸運。」

▲義教就聽住咁多先,不如再「入肉」啲去捐血呢?(左至右)Raymond – Manager, Security Management System、Chris – Supervisor, Security Management System

「冇時間?HK Express 幫你拆掂佢」

Teamwork 好多公司都注重,但係HK Express完全將團隊精神發揮到極致!實行要你冇藉口,冇後顧之憂咁去做義工。

阿Chris一直都係CSR team嘅常客,除咗成日去捐血之外,仲會參加好多HK Express嘅義工活動,例如探吓一班老人家、派食物畀露宿者等等。佢覺得HK Express最特別嘅喺,支持唔係一句口號咁簡單,而係每個同事就算未必參與到義工活動,都會用其他行動support。好似Chris嘅上司Raymond咁,如果啲義工服務需要係喺平日進行,Raymond會主動事先安排工作,盡量幫Chris騰空有需要嘅日子。

你以為捐血已經好大件事呀?有另一位HK Express嘅台灣同事連骨髓都捐埋呀!

William佢細細個就已經受到屋企人感染,將自己嘅DNA擺咗入台灣嘅骨髓資料庫。直到今年佢終於收到通知話要捐骨髓救人。所以佢就同公司講,諗住「快快脆」請幾日假。點知講完之後,唔單只佢嘅經理,就連成個部門都好支持佢,HK Express仲特別派咗香港同事去頂佢個位,等佢完咗手術之後仲可以抖足成個星期先開工,真真正正work as a team ,咁嘅公司邊度搵呀?

▲掌聲有請William!(照片由HK Express提供)

「最想就係一班同事有得著」

HK Express 有一個好強嘅 brand identity ──「YOUR MOVE」。而CSR team 正正係透過唔同嘅social service將同事帶出comfort zone,希望呢啲經歷令同事喺HK Express唔單止有career growth, 更重要係有個人成長。

▲唔講都唔知,原來HK Express喺前年仲試過「鏟泥齊種樹」!(照片由HK Express提供)

而佢哋都好感激嘅,係HK Express會用公司資源,出錢出力畀自己去做義工之餘,仲會畀到好多平時接觸唔到嘅機會自己,去睇吓個世界之餘,仲可以盡自己嘅能力去幫唔同嘅人。

可能有人會覺得:超,反正都唔關我事㗎啦。但呢種事不關己嘅心態,或者就係其中一個原因,令到呢個世界嚟到21世紀,點與點之間都仲可以有大反差。而HK Express做嘅嘢,或者就係想盡自己嘅努力去影響,甚至改變呢個社會。

後記:筆者就好奇啦,既然講到HK Express咁多義工活動,點解喺佢哋個網上面又見唔到㗎呢?Fiona笑住咁話:「因為其實好多義工活動嘅花絮都係for internal sharing,目的係想更多同事知道有呢啲活動之餘,仲想更多人可以加入CSR team,可以識到多啲唔同department嘅同事,又可以幫到更多唔同嘅人,一舉兩得。」所以話呢,當呢個世界需要更多愛嘅時候,唔一定要全世界都知道你嘅付出嘅。

你又想一齊做義工?✈️

HK Express's job postings
1 Likes
1 Likes

Weekly ranking

Show other rankings
If this story triggered your interest, go ahead and visit them to learn more